Agjensia e Lajmeve "SOT"
Agjensia e Lajmeve SOT - Politike
Articles
Rama niset për në Preshevë, përfaqësuesit preshevas vijnë në Tiranë
Ashtu siç ishte bërë e ditur edhe më parë, kryetari i Partisë Socialiste, Edi Rama do të niset sot për një vizitë në Serbi, ku pritet të takohet me komunitetin shqiptar në Luginën e Preshevës. Edhe pse primare në axhendën e tij është promovimi i librit “Kurban”, lideri i PS do të takohet dhe me drejtuesit e partive politike dhe të zgjedhurit vendorë që përfaqësojnë interesat e shqiptarëve. Por ndërsa Edi Rama ka planifikuar takime me drejtuesit e partive shqiptare, Ministria e Jashtme e Shqipërisë ka njoftuar për një takim që do të mbahet pikërisht me përfaqësuesit e këtij komuniteti nga Lugina e Preshevës në Tiranë këtë të shtunë.
Ministria jonë e Punëve të Jashtme ka konfirmuar praninë e deputetit shqiptar në Parlamentin e Serbisë Riza Halimi, kryetarit të Partisë për Veprim Demokratik, Galip Beqiri dhe kreun e komunës së Bujanovcit, Shaip Kamberi. Pas vizitës në Kosovë, Maqedoni dhe Selanik, kjo është vizita e radhës e kreut të PS-së si pjesë e turit për promovimin e librit “Kurban”. Në Luginën e Preshevës vizitat e zyrtarëve të lartë kanë qenë tepër të rralla, në vitin 2010, zëvendëskryeministri dhe ministri i Jashtëm Ilir Meta ka qenë i vetmi që ka vizituar shqiptarët në këtë zonë.
