Basha nga Shkodra: Dosja Ahmetaj tregon se gjithë qeveria është zhytur në korrupsion, pastrimi i politikës më imediat se kurrë

Lulzim Basha ka zhvilluar dje një takim me mbështetësit demokratë në Shkodër, nga ku ka deklaruar se pastrimi i politikës është më imediat se kurrë. Duke ju referuar çështjes së Arben Ahmetajt, Basha u shpreh se dosja tregoi se gjithë qeveria është zhytur në korrupsion, ndërsa shtoi se qeveria miraton ligje e ndërmerr vendime vetëm për interesat kriminale të një klani. Madje ai theksoi se drejtësia duhet të shkojë deri në fund, pra deri tek Edi Rama, njeriu që sipas tij, mban lidhjet e krimit dhe korrupsionit, sepse askush nuk mund të jetë mbi ligjin. “Dosja e SPAK për arrestimin e Arben Ahmetaj, tregoi se si kjo qeveri miraton ligje e ndërmerr vendime vetëm për interesat kriminale të një klani. Drejtësia duhet të shkojë deri në fund, deri tek Edi Rama, njeriu që mban lidhjet e krimit dhe korrupsionit, sepse askush nuk mund të jetë mbi ligjin! Parlamenti duhet t’i hap rrugë pa humbur kohë veting-ut dhe kontrollit të imtësishëm të pasurive dhe lidhjeve kriminale. Aleanca Qytetare për Demokracinë do të jetë koalicioni ynë për të pastruar politikën e për të mundësuar veting-un e politikanëve, listat 100% të hapura, votën e diasporës, kufizimin e mandateteve, rritjen e mekanizmave të kontrollit të qeverisë nga Parlamenti. Partia Demokratike do t’i nënshtrohet një procesi të thellë rinovimi dhe hapje ndaj profesionistëve dhe intelektualëve që ndajnë vlerat dhe vizionin tonë për një Shqipëri më të mirë. Me demokratët që ishin në ballë të qëndresës anti-komuniste, me të persekutuarit dhe pronarët, me kontribuuesit e pas vitit ’90, me burrat dhe gratë që sakrifikojnë prej dekadash, me të rinj e të reja nga brenda dhe jashtë vendit, Partia Demokratike do të formësojë alternativën që presin shqiptarët. Sot është koha e bashkimit të energjive, forcave, kapitaleve njerëzore e politike për t’i dhënë fund tranzicionit”, shkroi dje në rrjetet sociale Basha.