Grupi i PS takon Presidentin e “Confimprese Italia”, Balla: Të hapur për bashkëpunim ekonomik

Një përfaqësi e grupit parlamentar të Partisë Socialiste ka zhvilluar dje një takim me Presidentin e Confimprese Italia, Guido D’amico. Nënkryetari i grupit parlamentar të PS, Taulant Balla, në nisje të bisedës, bëri një përmbledhje të situatës së ndryshuar në Shqipëri sa i përket mundësive dhe lehtësirave të të bërit biznes si dhe klimës së favorshme për thithjen e investimeve të huaja. Deputeti Balla i shprehu Presidentit të Confimprese Italia gatishmërinë e Qeverisë dhe vëmendjen e Partisë Socialiste për mbështetjen e gjithanshme ndaj investitorëve të huaj, konkretisht atyre italianë. “Jemi të hapur për çdo bashkëpunim ekonomik. Shqipëria tashmë ka një program konkret dhe shumë të favorshëm për thithjen e investimeve të huaja.

 

Rezultatet e para kanë nisur të shfaqen, dhjetëra biznese të huaja kanë nisur punën dhe kanë krijuar mijëra vende të reja pune, sepse kjo është edhe një nga arsyet kryesore se pse Qeveria ka vendosur të lehtësojë dhe avantazhojë investimet e huaja”, deklaroi deputeti Balla. Ndërkaq, kryetari i grupit për mbështetjen e investimeve italiane, Artan Gaçi, i pranishëm në takim, nënvizoi faktin se në vetëm tetë muaj janë shumëfishuar kërkesat nga investitorët e huaj. “Brenda këtyre pak muajve janë shumëfishuar kërkesat nga investitorë të huaj, kryesisht ata italianë për të zhvilluar bizneset e tyre në Shqipëri, çka do të thotë se programet e qeverisë, masat e marra nga ajo kanë sjellë një klimë të re dhe shumë të favorshme për investitorët. Për Presidentin e Confimprese Italia, Shqipëria paraqet një mundësi dhe potencial të madh për investitorët italianë.

 

Zoti Guido D’amico shprehu interesimin e investitorëve italianë kryesisht në sektorin e turizmit, bujqësisë, fasonerisë etj. “Ky është takimi i parë për hedhjen e themeleve për një bashkëpunim të gjatë i cili do të pasohet nga një takim tjetër që do të zhvillohet ne Tiranë në javët e ardhshme ku do të jenë të pranishëm shumë investitorë italianë, pjesë e Confimprese Italia. Në fakt arsyeja pse sot unë jam në Tiranë është fakti se vetë investitorët italianë kane shprehur interesim të madh për zhvillimin e biznesit apo degëve të tyre në Shqipëri. Pra mund të them se nismat, programet e reja të qeverisë kanë zgjuar interesin e investitorëve italianë”, u shpreh D’amico.